Хэрэглэж байсан ухаалаг гар утасны борлуулалт дэлхий даяар 2026 он гэхэд 416 сая нэгж хүрнэ гэж “IDC”-ийн шинжээчид тооцооллоо. Энэхүү 99 тэрбум ам.доллароор хэмжигдэх зах зээлийг “Apple” компани тэргүүлж байгааг судалгаа харуулж байна. Тухайлбал: зах зээлд борлуулагдаж буй нийт хуучин гар утасны 82 хувийг “iPhone” эзэлж байгааг шинжээчид онцоллоо. “iPhone”-ийг бусад брэндийн ухаалаг утастай харьцуулахад үнэ цэнээ урт хугацаанд хадгалж байгаа аж. Ихэнх бүс нутагт хэрэглэж байсан ухаалаг гар утасны эрэлт нийлүүлэлтээ давж байгааг судалгаа харуулж байна.
2021 онд баруун Европын орнууд хуучин ухаалаг гар утасны эрэлтийг хангахаар 11 сая нэгж гар утас импортолж байсан аж. Өнгөрсөн онд инфляц эрчимжиж, хэрэглэгчдийн худалдан авах чадвар буурснаар хуучин гар утасны борлуулалт 11.5 хувиар өсөж, 282 сая нэгж давсан гэж шинжээчид тооцоолсон байна. 2026 он хүртэл хуучин гар утасны зах зээл жил бүр 10 хувиар тэлнэ гэж “IDC” тайландаа дурджээ.
Эх сурвалж: Bloomberg
